Indemnización a un mariñeiro

Despois de oito anos, o Tribunal de Superior de Xustiza de Galicia condenou á Xunta a indemnizar con preto de 90.000 euros á familia de Marcelino Ponche un mariño mercante coruñés que caeu sobre o dique do porto de Cariño e sufriu gravísimas feridas que o deixaron inválido durante anos. O home faleceu recentemente. O accidente ocorreu o 6 de xaneiro de 1997. Marcelino Ponche Barca, primeiro oficial do buque Brigantium que se atopaba atracado ao porto cariñés, camiñaba cara ao seu barco. Era de noite e debido á mala iluminación da zona e a inexistencia de varandas de protección, o oficial precipitouse sobre as rocas. Non se decatou de que o peirao pesqueiro tiña forma de L, estreitándose no lugar no que se produciu a caída, polo que, ao dirixirse directamente cara ao seu buque caeu sobre o dique. O tribunal considera que existe unha responsabilidade patrimonial da Administración responsable do porto, neste caso a Xunta por ser autonómico, pola mala iluminación dos accesos, aínda que sostén que existe unha responsabilidade compartida polo propio accidentado que coñecía o lugar. Por iso, reduce a contía indemnizatoria, e déixaa en preto de 90.000 euros. O patrón dun pesqueiro que se atopaba atracado cerca escoitou os berros do mariño ferido e acudiu na súa axuda, o que lle salvou a vida aínda que con gravísimas secuelas.