Sostibilidade, autoxestión, promoción dos produtos autóctonos e dalo a coñecer son os piares nos que se apoia "Cariño en lata", un proxecto de turismo, hostalaría e gastronomía que dará comezo o día 27 e que estará vixente ata de setembro de 2013. Un curso de cociña de produtos locais para aprendices e cocinillas convértese no punto de partida dunha oferta que nace para que o territorio de Ortegal "teña un recoñecido e merecido recoñecemento". O Concello de Cariño e o xefe de cociña Óscar Galandum están detrás dunha iniciativa que, ademais do curso xa citado, tamén inclúe outro especializado para hostalaría, un concurso de micro-cociña, pinchos e tapas, a elaboración dun receitario local e a edición dun libro-guía de turismo e gastronomía cun suplemento de actividades de ecoloxía, sendeirismo e lugares para divulgar as posibilidades que o municipio ofrece en todos os apartados. Para tomar parte na primeira das convocatorias, dende o Concello de Cariño infórmase de que ata o día 27 estará aberta o prazo de inscrición. O Concello será a referencia para aquelas persoas que desexen tomar parte nunha iniciativa que se impartirá en diferentes días e horarios para adaptarse á demanda. O prezo da matrícula tamén é variable, en función de que o pagamento se faga por adiantado ou fraccionado. Así, mentres que polo curso completo se aboarán 40 euros por 32 horas de clases, se se realiza o pagamento por adiantado aplicarase un bonificación de 5 euros, polo que o importe da matrícula será de 35. O centro social do Concello de Cariño acollerá o desenvolvemento dun programa formativo que se levará á práctica os días 27 e 28 do presente mes e o día 1 de decembro. Entre outros contidos, os participantes serán instruídos sobre cuestións dietéticas e nutricionais, a cociña con conservas, salsas e gornicións e algúns pratos de cociña internacional. Óscar Galandum traballou na cadea hoteleira Meliá, foi distinguido na Guía Chicha e resultou finalista como cociñeiro do ano en 2009 e 2011. Dende hai un tempo reside no municipio de Cariño
Veciños e comerciantes de Ortigueira piden a retirada dunha grúa nunha das rúas do centro da vila que impide o tránsito de vehículos e que condena con perdas de vendas a todo o comercio e á hostalaría da zona, por favorecer unha obra privada. Os afectados mantiveron o pasado luns unha reunión co alcalde en relación á situación xerada pola derruba parcial dun inmoble o pasado 16 de agosto a consecuencia das obras desenvolvidas na parcela anexa. Por agora se encargo un informe técnico ao arquitecto municipal que concretará as medidas precisas para garantir a seguridade da rúa, así como valorar as alternativas para substituír a grúa existente.
Ortigueira pechou a vixésimo oitava edición do Festival do Mundo Celta. Con menor asistencia que en anos anteriores, unhas 50.000 persoas pasaron nos últimos catro días pola vila ortegana. O certame desenvolveuse sen incidentes, na que supuxo a primeira cita coa prohibición expresa de carpas «dance» e aparatos eléctricos na acampada de Morouzos, máis tranquila, con menos cacharelas e raves, que deixou sabores dispares entre os asistentes. Unha normativa municipal puxo couto «ás actividades que proliferaron nos últimos anos» no piñeiral, cun gasto adicional en seguridade, a cargo dun presuposto inferior a 400.000 euros, contía similar á do 2002. Como é costume, o desfile de bandas puxo o broche a 96 horas de música que arrancou con dúas xornadas de mal tempo. Máis de 300 músicos, de oito formacións, marcharon a sopro de fol e redobre de tambor polas rúas de Ortigueira. Esa zona urbana, duns 1.800 veciños, viu como nos últimos días crecía exponencialmente a poboación e, á par, os servizos de seguridade. Uns 160 efectivos -80 deles de Protección Civil da provincia de Málaga- velaron pola seguridade dos folkies durante o certame, declarado de Interese Turístico Internacional no 2005. Policía Local e Autonómica, Seprona, Garda Civil e voluntarios completaron o servizo.
